Յուրաքանչյուր ազգի պարտականությունը մարդկության հանդեպ նախ և առաջ դրսևորվում է սեփական ազգի կենսունակության պահպանման և սեփական մշակույթի զարգացման ձևով:

Գարեգին Առաքել Եղիշեի Տեր-Հարությունյան

Սիրելի բարեպաշտ ժողովուրդ ի հայրենիս և ի սփյուռս,
Տարեմուտի այս երեկո Մայր Աթոռ Սուրբ Էջմիածնից Հայրապետական Մեր սերն ու բարեմաղթանքերն ենք բերում ամենքիդ։
Ամանորը սահմանագիծն է պատմություն դարձած օրերի և հուսառատ գալիքի։
Փրկչական 2024 թվականը դիմավորում ենք խոր մտահոգություններով, դիմավորում ենք ահռելի կորուստների անամոքելի ցավը մեր սրտում։ Ծանր տարի ապրեցինք, սակայն Տիրոջն ապավինած՝ հույսով ու լավատեսությամբ ենք նայում մեր ազգի ապագային։ Արցախի բռնազավթման և հայաթափման, Հայաստանի շուրջ ստեղծված լրջագույն իրավիճակով և առկա հիմնախնդիրներով հանդերձ՝ հաստատակամ պիտի հաղթահարենք դժվարությունները՝ ամուր պահելով նվիրումն ու սերը առ հայրենին և հավատը առ մեր Ամենակալ Տերը։
Սիրելիներ, ուրախության, թե նեղության պահերին մեր ժողովուրդը միշտ ապավինել է Աստծուն, միշտ ուժ ու զորություն առել Բարձրյալից՝ հավատքով, որ Աստված մեզ հետ է։
Անտարակույս, մեր ժողովրդի հոգևոր ներուժն ու ոգու ամրությունը մեզ պիտի առաջնորդեն վերհառնումի և հայոց կյանքի հաղթական վերընձյուղման։ Մենք ժառանգներն ենք մի ազգի, որ տառապել ու չարչարվել է, բայց չի հանձնվել, ցեղասպանվել է, բայց չի կործանվել, սրատվել է, բայց չի մահացել:
Արդարև, չի կարող ընդհատվել պատմությունը մի ժողովրդի, որի տարեգրությունը զարդարված է աստվածպաշտության և հայրենասիրության հրաշալի վկայություններով, ապրելու և արարելու անընդմիջելի տենչանքով:
Փորձությունները հաճախ են պատահում ժողովուրդների կյանքում, սակայն դժվարին իրավիճակներից հաղթանակած են դուրս գալիս այն ազգերը, որոնք աննկուն են մնում ոգով ու առ Աստված հավատքով և արիաբար դիմակայում նեղություններին ու մարտահրավերներին. «Տերը ապավենն է բոլոր նրանց, ովքեր հույսը դրել են Նրա վրա»,- ասում է սաղմոսերգուն (17.31)։
Արդ, սիրելիներ, նոր տարում նորոգվենք հոգով ու մտքով, զորանանք հույսով, ինքնաքննությամբ անդրադառնանք մեր ընթացքին ու գործերին, սրբագրենք թերացումներն ու սայթաքումները, թույլ չտանք, որ ազգային կյանքում սերմանվի ատելություն ու պառակտում, արմատավորվի կործանարար հարմարվողականությունն ու անտարբերությունը։ Ապրենք հավատքով զարդարուն կյանքով, միմյանց հանդեպ աստվածապատվեր սիրով, որպեսզի զգանք Աստծո շնորհաբեր ներկայությունը մեզանում։
«Մեր անձերը կառուցենք հավատի սրբությամբ, աղոթենք Սուրբ Հոգով, պահենք մենք մեզ Աստծու սիրով»,-ինչպես հորդորում է առաքյալը (Հուդա 20-21)։ Միասնական լինենք Հայաստանում ու սփյուռքում և մեր համախումբ ջանքերը ծառայեցնենք հանուն համազգային շահերի պաշտպանության, հայրենյաց ու ազգի կյանքի նոր արշալույսի կերտման։
Գիտակցենք, որ հայրենիքը այն միակ սրբազան վայրն է, որտեղ ամբարված են բոլոր ժամանակների հայ սերունդների աղոթքներն ու երազները, որտեղ շարունակ պիտի կերտվի հայոց ինքնությունը, և որի սրբազան հողից է հավետ ուժ առնելու հայ ժողովուրդը: Հոգածու սիրով շրջապատենք Արցախից բռնի տեղահանված մեր քույրերին ու եղբայրներին, նրանց մեջ առատացնենք հույսը, որ երբեք չմարի հայրենի Արցախ վերադարձի տեսիլքը, և զորեղ մնա հավատն առ Աստված։ Աջակից լինենք կարիքավորներին ու նեղյալներին և Բարձրյալի օգնականությունը հայցենք անհայտ կորած և գերյալ մեր զավակներին ու նրանց ընտանիքներին։
Սուրբգրական պատգամի համաձայն՝ չմոռանանք բարեգործությունը և մեր ունեցած բարիքներին միմյանց մասնակից դարձնելը, քանզի այդպիսի՛ պատարագներն են հաճելի Աստծուն (հմմտ. Եբր. 13.16), և այս է ճանապարհը մեր ժողովրդի բարեպաշտ ու ապահով կյանքի, այս է ճանապարհը դարավոր ու նվիրական արժեքներով մեր ազգի և պետության լինելիության ու հարատևության։
Սրտագինս աղոթենք, որ Երկնավոր Տերը խաղաղության մեջ պահի հայոց աշխարհը և ողջ մարդկությանը, Իր զորակցությամբ հույսի ու սիրո շնորհները և հաղթության պարգևը սփռի վտանգների միջով անցնող մեր հայրենիքի ու համայն հայության կյանքին այսօր և միշտ և հավիտյան. ամեն:
Բարի, օրհնյալ Նոր տարի։

https://www.youtube.com/watch?v=yIpZ4SLZWA8

Սիրելիներ, շուտով տարեմուտ է, 2020-2023 իրադարձությունների շղթան, որքան էլ որ դառն էր ու անընդունելի, ցավոք իրողություն է։ Շատերդ կփաստեք, թե որքան բարդ է զբոսավար լինել հատկապես հիմա։ Շնորհակալություն գործով, հոգով և մտքով անձնվեր աշխատանքի համար։ Գիլդիան ինչպես նախորդ տարիներին այս ընթացքում էլ շարունակել է ինքնակրթության և վերապատրաստման գործունեությունը, կարևորելով զբոսավարի մասնագիտությունը և դրանից բխող ողջ պատասխանատվությունը և իրականացնել մի շարք ծրագրեր։ Գիլդիան հավատարիմ է իր առաքելությանը և անկախ տարատեսակ դժվարությունների 2024-ին նույնպես գնալու է իր նախանշած ուղիով։ Մաղթում ենք բոլորիս տոկուն, հաստատակամ տրամադրություն ոլորտի առջև մեզ բաժին հասած խնդիրները՝ առաջադրանքները, պատվով լուծելու համար։ Առողջ եղեք ու միասնական։ Լիքը գործ ունենք անելու։ Բարի Տարեմուտ։ Խաղաղ տարի։

Սույն թվականի նոյեմբերի 13-17ը կայացավ Երևանի քաղաքապետարան / Yerevan Municipality -ի նախաձեռնությամբ և Հայ Զբոսավարների Գիլդիայի կողմից մշակված և իրականացրած «Թրեյնինգ քաղաքային զբոսավարների համար» ծրագիրը։ Միջազգային թրեյնինգին մասնակցեցին Երևանի քույր քաղաքների, ինչպես նաև Հայաստանի մարզերի, Արցախի և Երևանի զբոսաշրջության ոլորտի գործընկերները։
Հատուկ շնորհակալություն ենք հայտնում Երևանի քաղաքապետարանի տուրիզմի բաժնի աշխատակիցներին, Երևան քաղաքի պատմության թանգարանի, “Erebuni” Historical & Archaeological Museum-Reserve «էրէբունի» պատմահնագիտական արգելոց թանգարանի, Alexander Spendiaryan House-museum Ալեքսանդր Սպենդիարյանի տուն-թանգարանի, Ervand Kochar Museum - Երվանդ Քոչար թանգարանի նաև Tufenkian Heritage Hotels Թուֆենկյան ավանդական հյուրանոցների մեր գործընկերներին։
Լուսանկարները՝ Ռ. Աթանեսյանի, Կ. Հակոբյանի

Սիրելի զբոսավարներ բավական դժվար է մեր իրականության սարսափելի, անընդունելի դեպքերի ֆոնին շնորհավորել Հայաստանի 3րդ Հանրապետության 32-ամյա տարելիցի առթիվ։ Բայց անտեսել ու չհիշել այս օրը, կնշանակի արհամարել ու մոռանալ Հայաստանի և Արցախի անկախության, ապրելու իրավունքի համար իրենց ամենաթանկը՝ կյանքը զոհաբերած հերոսներին։ Հայաստանի 3-րդ Հանրապետությունը դեռ երիտասարդ է, բայց ոչ պատանի։


Հիմա և միշտ մեզանից յուրաքանչյուրը պետք է հայրենիքը խորապես ճանաչելու, այն ավելի քան երբևէ սիրելու ու պահպանելու պատասխանատու գործում լինի միասնական, վճռական, ողջամիտ և տոկուն։ Խորագետ եղեք, եթե չեք ապա դարձեք։


Բազմիցս ենք նշել, որ զբոսավարի աշխատանքը հատկապես մեր իրավիճակում գտնվեղ երկրում կապ ունի Ազգային Անվտանգության հետ։ Ուստի միշտ արթուն պահեք ձեր միտքը, իսկ խոսքը կշռադատված, միտված Հայրենիքի պաշտպանությանը։ Գործե՛ք, հանուն միացյալ Հայաստանի։


Գործն է անմահ, լա՛վ իմացեք,
Որ խոսվում է դարեդար,
Երնե՜կ նըրան, որ իր գործով
Կապրի անվերջ, անդադար։

Հովհաննես Թումանյան, 1902թ.